2009/11/12

حبل السره ..

ولا حد يفهم نظرتى ......... غيرك
ولا حد يغفر قسوتى ......... غيرك
ولا ألـــف ايـــــــد تـتـــمـد لـى يـامّه
تمسح دموعى ..أوتكفينى عن خيرك

أ مـــــــــا ن

سرسوب أمان
وانا مرعوب ومتكتف
أكون غرقان
تشيلنى عنيكى وتجدف
أعود لزمان
وانط فـ حضنك اتشحتف

وجــــــــع

شمس الغروب ..
وكنت باعشقها
جايه بتلسع نار
كتفى اللى شايل سد
تنزل يادوب ..
والنجمه تسبقها
ساحبه ستاير مرار
وضلمه مالهاش حد
تحرق قلوب ..
وتذل أشواقها
فى الخوف يموت الهزار
والضحكه رعشة خد

2009/09/24

توهااااان









من أكثر المشاهد غرابة واستحقاقا للتأمل , ذلك المشهد الذى استغرق أسبوعا أو أكثر فى خضم معركة انتخاب مدير لليونسكو . وأقر أنى لم أشهد على مدى السنوات القريبه الماضيه مثل تلك الفوضى :


فوضى فى الاطروحات والمواقف , فوضى فى الانتماءات وفى الدوافع وفى الاهداف ....


لم أر هدفا يجتمع عليه ليبرالى وعلمانى واخوانى وصهيونى وبتاع كازوزه مثلما كان فى تلك المعركه , وكل له أسبابه !!


حاولت أن أفهم , أن أجد بعض المبررات التى تجمع كل هذه التيارات فى صف واحد حتى لو كانت أسباب فئة ما تتناقض مع أسباب الأخرى ( الصهاينه والاخوان مثلا ) ....


الليبراليون : لأنه أحد أعضاء منظومة حكم ديكتاتورى فاسد ....


العلمانيون : لأنه يرقص دائما على السلم فى مجابهته للتيار الدينى ( ضجيج بلا طحن ) .....


الاخوان والتيار الدينى : بسبب مقولته الشهيره عن الحجاب , واسباب اخرى قد يكون منها أنه رسام ( والرسم حرام عند السلفيين !!)...


الصهاينه : بسبب مقولته الشهيره أيضا عن حرق الكتب الاسرائيليه ورفضه للتطبيع .....


أما بتاع الكازوزه : فيكفى أن يظل رجلا فى السلطه لاكثر من عشرين عاما حتى تعافه وتلفظه النفس السويه .....



ولكن اللافت للنظر حقا هو موقف الاخوان بالتحديد , الذين خاضوا المعارك تلو المعارك مع الرجل .. ثم اذ بهم أو باحد نوابهم فى البرلمان ( محسن راضى ) يطالب بانسحاب الدول العربيه والاسلاميه من اليونسكو احتجاجا على التحالفات ( غير الشريفه!!) التى واجهت المرشح المصرى لاسقاطه اليوم السابع


بالله عليكم هل هناك أكثر من ذلك فوضى وغموض .. وتوهااااااان


2009/09/22

خااااااينه !!


ربنا يهديـــــكى ويشفيــــــكى

فلست خلاص لجل ارضيكى

مجنونه .. وفقعالى مرارتى

وبقالى كتيــــــر شاكك فيكى



ياما نفسى اركب ..واستمتع

بشويش على كيفى او ابرطع

مش كل يومين تعبانه ياناس

نايمه .. ولاحد يصحيـــكى



حكايات وحجج دايما عَـنــــدك

وتسوقى دلالك على عِـنــــدك

اعترفى وعلى ايدى خلاصك

علاقتك ايه بالميكانيـــــــــكى ؟؟؟






2009/09/04

الدنيا سباااااق





الدنيا سبـــــاق
والعالم كله عايش فى سباق
وكأنه وبـــــاء
يحصد أرواح الناس بغبـــاء

الدنيا سبــــــاق
ماراثـون ومالوش خط نهايـه
بقى طبع وداء
نجـرى للجـرى بدون غايـــــه

الدنيا سبـــــاق
كده فجأه تلاقى عمرك راح
للراحه تشتاق
ولا تاخد نفسك ولا ترتـاح

الدنيا سبـــاق
ولا حدش حاسس بالتـــانى
حتى العشاق
بيحبــوا وينســوا فى ثوانى

2009/07/29

ناس من بلدنا




الناس اللى بتمشى محاسبه
مغصوبه وغاصبه
محشوره فى كل حكايه
وكل مناسبه

أول من يقبض

آخر من يدفع
وكلامهم حلو ومترتب وبيقنع
الصبح تحرض عمال
والمغرب تتجوز عرفى صاحب المصنع

تلقاهم آخر صف فى اى مظاهره
ولاترتاح وتريح
ولا تسمح بمخاطره
فى الشده تجرى وتتدارى
تختفى فتره
ولاوقفت فى طابور العيش
ولاشربت كيلوباتره
مستقبلهم دايما وردى
وسيرتهم عاطره
نسوانهم حلوه وناعمه
وعيالهم شاطره

2009/07/14

مش ها استجدى

انا مش طالب شفقه وعطف

ولا باشحت حنيه

ولا هاتمنى اشــــوفك خطف

تمن بنظره عليه

لو مش حابب ..

انا مش حابب

لو هاتســـيب ..

انا قبلك سايب

جرب عِندى .. وجرب غضبى

ويبقى تحدى ....

مش ها استجدى وجودك جنبى

مش ها استجدى ....

2009/07/13

أمة فى خطر

لم يعد الامر مجرد مناوشات موسميه مرتبطه بحوادث متباعده بل اصبح وراء كل حجر يتعثر فيه طفل وعلى كل ناصيه يقف عليها مراهق وعلى ابواب كل متجر يختلف فيه البائع مع الزبون
ولم يعد ينحصر فى بعض الاغبياء او الجهلاء او الموتورين وانما اجتذبت الدائره الرهيبه –او ربما سعى اليها - ذوى المكانه والمناصب والحيثيات ومن يفترض فيهم الروية والحكمة وبعد النظر
ولم يعد دفاعا عن فكر او عقيده وانما اصبح دفاعا عن وجود
عن الاحتقان الدينى والطائفى فى مصر ...... اتكلم

2009/07/05

النيـــل ... والنيــله

نقرأ على فترات متباعده أخبارا فى صياغات مختلفه عن النيل .. ومياه النيل
موضوع دمه تقيل .. ليس فيه اثاره .. ولا فرقعات .. ولا نميمه .. ولا بطله وبطل .. يعنى من الآخر .. فيلم قصه مش مناظر !!
لكن .. هل يمكن أن نصدق أننا بعد سنوات ليست بالكثيره ربما نقتتل من أجل شربة ماء .. لأسباب بعضها بشرى بفعل فاعل .. وبعضها مناخى بفعل الطبيعه .. هل يكفى هذا لخلق بعض الاثاره – الغير مقصوده – للموضوع !!


- لو عرفنا ان دول المنبع التى تأتينا منها المياه .. تعمل على بناء سدود ومشاريع لتستفيد من المياه المهدره .. وهذا حقهم .. وقد يكون لبعض هذه المشاريع تأثيرا على كمية المياه التى تصل الينا .

- ولو عرفنا ان اسرائيل تلعب هناك منذ سنوات .. وتبنى بهدوء ( ولكن ليس سرا ) علاقات بدول الجنوب .. وتعرض مساعدات ومشاريع .. وتمويل .. وتسليح .. وتدريب . ونحن منذ سبعينيات القرن الماضى اتجهنا شمالا بكل طاقات حكامنا النهمه للتغيير فى كل شىء وأى شىء .. اقتصاديا وسياسيا وحتى جغرافيا .. وكاننا مصرنا مقولة المسرحى الانجليزى اوزبورن ( انظر جنوبك فى غضب !!) وليتنا فلحنا !!

- ولو عرفنا ان السودان ينقسم .. بل يتفتت ..وبدلا من التعامل مع حكومه واحده .. ستصبح حكومات لها مصالح وارتباطات مختلفه وتاريخ ملغم بصراعات دينيه وعرقيه .

- ولو عرفنا – واعتقد أغلبنا اصبح يعرف – مليارات الجنيهات التى انفقت على مشروع توشكى الذى هلل له النظام المصرى و صوره لنا على أنه الجنه الموعوده .. ثم أصابهم الخرس فجأة .. وكأنهم يتكتمون على فضيحه .

- ولو عرفنا اننا لو انفقنا ماأنفقناه على توشكى فى تحسين وسائل الرى والصرف .. وتعميم الرى بالرش او بالتنقيط لأصبح المردود العملى افضل الف مره .

- ولو عرفنا مليارات الجنيهات ايضا التى تنفق على منتجعات سكنيه لفئه من الناس قليلة العدد كثيرة الحظ .. والميزه الرئيسية لتلك المنتجعات التى تركز عليها اعلانات التسويق هى ملاعب الجولف وحمامات السباحه والبحيرات الصناعيه .

- ولو عرفنا أننا أفسدنا محصول القطن عن عمد وتقلصت حصتنا فى تصديره وفى المقابل مازلنا نزرع الارز بكميات تفيض عن الحاجه ونصدر الفائض وهو يستهلك من المياه كميات مهوله فى ريه . وكأننا نصدر مياه النيل .

- ولو عرفنا ان بعض القرى لاتصلها مياه الرى وتموت الزراعات عطشا ويحتج الفلاحون ويتظاهرون .. والأرض لو عطشاااانااااااااااا

- ثم لو عرفنا – وكلنا يعرف – أن كل قيادات البلد ونخبتها ومنتفعيها المؤيدون ومنتفعيها المعارضون ، كل همهم ومايشغلهم الآن .. أن تظل مصر مستقره .. هادئه .. نائمه .. استعدادا لانتقال سلس للسلطه .. ونصحو ذات يوم على مصر بلا نيل .. ولكن بنيله !!

2009/06/26

تغوووور !!


الصحبه فى ليـلك صحــرا
ورمال .. وصخور

وعنيـــكى تشــع صــــــفار
وشرار .. وشرور

وكلامك صـــــوت بلامعنى
لفــاف .. بيــــــدور

وان قـال .. ينطـق بالكـدب
وشــــــــهـــادة زور

الضحكه الغناجه بفجاجه
قاتـل .. مأجــــــور

غـلـطـك .. له تبريـــــر
ذنـبـك مغفــــــــــــور

وانا .. لو بس همست
ما ابقـاش معــــــذور

مش عايز دنياكى ( ياملاكى )
الجنه تهون لو تبقى معـــاكى

ترخص ...
وتغـــووووووور !!!!

2009/06/11

ساكته ليـــــــه ؟؟!!

ايه ؟ .. مالك ؟
ساكته ليه ؟ مش عوايدك
صعب حالك ؟؟
صعب أكتر ع اللى رايــدك
اللى شد رحاله جالك
واللى داب على باب وصالك
واللى يدفع عمره سهم ف رأسمالك
لجل ماتكتر عوايدك
....
ايه ؟ .. مالك ؟
ساكته ليه ؟ ماسكه راسك ؟
بتفكرى .. والا صداع
والا مهمومه بناسك ؟
اللى بايع .. واللى ضاع
واللى مايهموش خلاصك
الولاد كبروا يامّه ..
اللى - وهو طفل - باسك
لما شب .. جاتله طوفه
حب يخرج من لباسك
وببساطه شافله شوفه
قال مصالحى قام وداسك
....
ساكته ليه ؟
بلى ريقى بكلمتين
أو دمعتين
أو حتى شاورى ع الوجع
قولى فين
عندك أمل حد يرجع م الولاد
ويكون جدع
ويشيل مظالمك ؟!
قاعده لسه مقرفصه
وبتسمعى صوت الودع
على شط حلمك ؟!
خوووووف .. وهمس .. ووشوشات
ماعادش معنى للسكات
ولاعادش طعم لأى حاجه م الحاجات
غير المرار فى الحلق باقى
وجثة الأمل اللى مات
الولاد ؟؟!!
الولاد كبروا يامّه
بعتروا دقيقك وزيتك
باعوا صيغتك
رهنوا بيتك
ورثوكى من قبل الممات
....
عايز ارجّع !
عايز افضى جوفى من كل العفن
عايز أنااااام
خايف يا أمى
ليلاتى باحلم بالكفن
اصلى واحد من عيالك
اللى عشقوا ف يوم جمالك
واللى غضبوا
واللى هربوا
ولاشغلهم يوم سؤالك
ايه ؟ .. مالك ؟
ساكته ليه ؟؟

2009/05/25

عرافه

هل قالت أن الهجــر هوان يغرس فى اعمـاقـى الآه
وأن حيــاتى دونك تيــه لارجعـــة فيـــه لســــــواه
وحبـك قدر يرسـم قدرى مشفـوعــا بالصـــبر دواه
وألوذ بواديــك الطـــارح أحسـبه ينبـوع حيــــــــاه
ضميـنى ياقـرة عينى ولقلبى الموجــوع ضنـــــــاه
هاتيــها تلك العرافة ترشـدنى لطـريــق نجــــــــــاه

2009/05/05

البـــارح ..


البــــارح .. بـس البـــارح
عـديـت البـحـر المــــــالـح
لارياح ولاموج فى طريقى
ولا قسوه ولا شىء جـارح

طعم الحيــــاه اتغير
احلو م البـــــــــارح
لون الحيــــاه اتغير
ولا عادش لون كالح
ورجعت انا صغير
مولود من البــــارح

مولـــــود أنا باحبى
ولقيت ايديـك جنبى
شبيت على غصنك
حبيت شجر طـارح

نسمة هواك وعـدى
والفرح شىء معدى
وسقيتنى كاس حبك
بماورد .. وروايـح

2009/05/04

فى بعدك ...


فى بعدك ..ننطوى ونبات
على عتبات سنين قسـوه
ولاتطـــرح قلوبنـــا نَبات
ولا غزل الرموش كسـوه
وعجز يطأطأ الشـنـبـــات
ولا معنى لنـون نســـــوه
ونهرب من قدرنا ساعات
وندفـــع عمرنــا رشـــوه
ونجتر الليــالى آهـاااااات
نموت أغراب ولا نسـوى

2009/04/28

ما أحلى اختيارى



عينـاك والنهـدان حبيبـتى متواطئـــان
يرسمـان مخطـطا خـبـيـثـا لانكســـارى
ترسـل العيــون لـى خـدرها الوسنـــان
ويغرس النـهد الفتى نصـله النــــــارى
مســالم أنـا جـدا .. ولـى قلب جبـــــان
تقـابل العـــداء بالطيــب أزهـــــــــارى
اخترت لـى قـبـرا فـى حضـنك الفتـــان
وعشت الموت عشقا ما أحلى اختيارى


سنه أولى فصحى

2009/04/16

حلوه

حلوه ... رقيقه ... صُغَيره
شفتك رجعت سـنيــــن ورا
ياهل ترى ....... ياهل ترى
أنا اللى جيت الدنيــــا بدرى
والا انتى جيتى متأخــــــره ؟؟!!

2009/03/26

عيش ..!!

بتدور على ايه حواليك

مالك كده حيران .. زهقان

متكحله بالحزن عنيك

دى القسوه ماتحلبش حنان



حاسس ان اوانك فات

وبتسرق م العمر اوان

عايز تبقى سعيد ( هيهات !!)

ولمين ح تسيب الأحزان



قول : انا حر .. وانت أسير

وانت كسير قول: انافايز

اهمد بقى خليها تسير

عيش زى ماغيرك عايز

2009/03/22

معادله جبريه ..!!

الموت .. طرف
وعيشة القرف .. طرف
ولما تصبح الحقيقه عار
والكدب ع النفوس شعار
بتصبح البيوت قبور بلا صبار
ويصبح السكوت .. ترف
ساعتها يبقى الموت ..
طريقنا للشرف
المعلم : سيد حجاب

2009/03/21

طلاق بالتلاته ..!!

منذ فتره .. انتابتنى حالة ( زهق ) من كونى احاول دائما أن أكون ( محايدا ) !!!

وقررت اعادة التفكير فى الأمر ..

كيف ؟؟

كنت قد اكتشفت يوما أن كل رأى فى أمر ما .. له وجاهته .. خصوصا اذا ماعرض عليك بمهارة وبشكل احترافى ..

وكثيرا ماكان ذلك يوقعنى فى حيرة مابعدها حيره .. خصوصا اذا ماكان المعروض أمامى وجهات نظر مختلفه ومتناقضه ..

ولكنها جميعها لها من نقاط القوه ماقد يجبرك على احترامها والانجذاب اليها .. شىء رهيب لو تدرون .. وأعباء نفسيه قاسيه

كنت أهونها على نفسى متمحكا فى نسبية الاشياء والحقائق .. بمعنى .. أن كل الأمور هى حقيقيه بنسبة ما ..!!!

والنتيجه .. انى كنت فى أغلب الاحيان غير قادر على تشكيل رأيى الخاص .. أو .. احاول الأخذ من هذا ومن ذاك لاستنباط

رأى قد يكون مختلفا بالكامل عن كل ماسبق .. بما يشبه اعمال الجدليه الهيجليه التى تفترض أن تفاعل المتناقضات لابد أن

يخلق جديدا ...

وبعد أن وصلت الى درجة لم اعد اتحملها .. واكتسبت كل الحقائق صفة الميوعه .. كان حنينى يزداد يوما بعد يوم للـ ( انحياز ) !!

كنت افتقد ذلك الحماس الطفولى لشىء ما .. وشخص ما ..

والآن .. أعيد اختراع العجله .. وأعلن اكتشافى العظيم .........

هناك فارق بين أن تكون محايدا .. وأن تكون موضوعيا ...!!!

لايوجد انسان محايد .. فاختيارنا لأكلنا .. ولبسنا .. وأصحابنا .. والكتاب الذى نقرأه ... الخ الخ

كل ذلك هو انحياز صريح .. ولايجب ان نلوم انفسنا عليه ..

ولا توجد وسيلة اعلام محايده ..مهما ادعت وحاولت خداعنا .. فالقائمون عليها يختارون المواضيع التى يبرزونها .. والاشخاص الذين يستضيفونهم .. وفى ذلك ميل وانحياز لاشك فيه ..

أما الموضوعيه.. فهى ممكنه .. بل واجبه وتستحق العناء .. وهى أن تكون أمينا فى عرض الأمور كماهى

الموضوعيه هى أمانة نقل الخبر أو المعلومه دون تدخل بالحذف أو الاضافه أو التحريف

أما الرأى فهو نتاج ثقافات وخيارات مختلفه .. فيجوز فيه الانحياز

لكل ماسبق ..

قررنا نحن فلان الفلانى .. أن نطلق الحياد بالتلاته

2009/03/05

تعبت بجد

تعبت بجد ..
والمشوار من غيرك صعب
وحيلى اتهد
والليل وحشه وتوهه ورعب


تعبت ...
تعبت بجد
ولسه باكابر
لسه بامثل دور الصابر
قادر يعنى
أو مستغنى ....
لابس وش مابيعبرش
جامد .. غامض
ولا بيحن
وتحت الوش
قلبى الهش
مش بيدق ..
لأ .. بيئن ..
بيسبح فى بحور ملكوتك
يسعالك ويطوف حواليكى
وحشتنى البحه اللى ف صوتك
والحزن النعسان فى عنيكى
تعبت ...
تعبت بجد ....

2009/03/03

لحظة ضعف

نمر أحيانا بلحظات ضعف .. وتعبير ( نمر بـ .. ) تعبير دقيق غالبا لأننا بالفعل نعبرها .. بعضنا قفزا وبعضنا زحفا ..
وأقسى ما فى الأمر هو أن نتعايش معها أو نستسيغ مذاقها .. ونعتادها .. أو نتوحد معها
فارق كبير بين أن نعبر بركة آسنه عفنه .. وبين أن نسقط فى بئر سحيق
فى الأولى .. قد نتأذى .. ولكن المؤكد هو خروجنا بتجربة ما ..تؤثر سلبا أو ايجابا على خطواتنا القادمه
أما فى الثانيه .. فليس بعدها .. بعد !
نصبح نهبا لما يمكن أن نسميه (ايدز عاطفى !!) .. تتهاوى مناعتنا .. وتنهشنا أسئله وجوديه .. عن جدوى كل ماكان وماسوف يكون .. وماهية الاشياء والاشخاص .. وتكتسب كل الأشياء طعم مراراتنا .. ولون خيباتنا
فى الأولى .. نحتاج الى صديق
فى الثانيه .. نحتاج الى طبيب !!

2009/03/01

مراتى .. وانا حر فيها ..!!

رجل يضرب امرأته فى الطريق العام .. تصرخ وتولول .. يتدخل بعض الماره .. فيقول لهم الرجل غاضبا : ماحدش له دعوه ..
مراتى وانا حر فيها ....!! بل وقد يلوم امرأته لاستغاثتها بالغرباء !!
هذا المثال الذى قد يبدو ساذجا يتبادر الى ذهنى كلما صدر تقرير من جهة دوليه يتعلق بالحريات ويدين النظام المصرى لانتهاكه لحقوق الانسان .. وترد الحكومه - ومعها جوقة المنتفعين - بأن هذا تدخلا فى شئونها .. وأن المنتقدين لا تعنيهم حرية الشعب المصرى ..
ويتهمون أى ناشط سياسى مصرى يلجأ لتلك المنظمات والجهات الدوليه مستغيثا يها بالاستقواء بالخارج !!.. وينخدع اغلبنا من الوطنيين المخلصين بهذه الحجج التى هى قولة حق يراد بها باطل .

لنلتزم بالموضوعيه لن ننكر أن هناك من الدول الناقده للموقف المصرى من حقوق الانسان مصالح ومنافع وتتخذ من انتقاداتها وسيلة لممارسة الضغوط على النظام لأسباب تخص سياستهم فى المنطقه ولتحقيق منافع خاصه بهم .. والدلائل على ذلك كثيره .. وان هذه الدول - وخاصة الولايات المتحده الامريكيه - كانت فى الغالب من أكبر الداعمين للنظم الديكتاتوريه اذا ماكان ذلك يصب فى مصلحتها ..
ولكن ..
ماذا يمنع أن تتلاقى مصالحنا - كشعوب - مع مصالح ارادات اجنبيه فى وقت وظرف بعينه .. ؟؟
ماهى الجريمه الكبرى فى أن تستغيث الشعوب المغلوبه على أمرها وتطلب النجده من غرباء مادام الاقرباء يستقوون عليها ؟؟
لماذا يؤمن نظامنا السياسى بالعولمه ويبشر بها ويهلل لها اذا ما أراد تبرير ارتفاع الاسعار متحججا بأننا جزء من كل وأن العالم اصبح قرية صغيره الخ الخ .... ولا يقتنع بان نفس الحجه يمكن أن تقال فى أمر الحريات التى باتت تغزو مجاهل افريقيا ؟؟

نعود الى المثال السابق ( الرجل والمرأه ) ..
قد يكون بعض من تدخلوا لمنعه من ايذاء زوجته لهم أغراض اخرى .. ولكن هل تلام هى لأنها تصرخ ألما وتوجعا ؟؟!!!