ياجريد النخل العالى ..

مش عارف ليه كل مااسمع كلمة ( مثقف ) .. أفتكر مطلع الأغنيه دى .. ياجريد النخل العالى .. ميل وارمى السلام !!
هل هى النظره الشايعه عن المثقفين .. صوره نمطيه عن حد شعره منكوش .. ومابيستحماش .. وتصرفاته توحى بأعراض الشيزوفرينيا
؟؟ ... هل لأن الناس دايما شايفينه غامض ودايما بينه وبينهم مسافه .. لا هو عايز ينزل .. ولا هم قادرين يطلعوا ..؟؟!!
ودايما بنقرا عن أزمة المثقف مع السلطه .. والقمع .. الخ الخ ..
والحقيقه ان أزمة المثقف - فى بلادنا - الحقيقيه مع الناس ..
المثقف فى مجتمع نصفه تقريبا أمى .. يكسوه احساس تلقائي - لاواعى - بالتميز .. وانه من طينه مختلفه .. وبالتالى يتعاظم احساسه بالغربه .. وان ماحدش فاهمه .. وأنه سابق عصره .. الخ الخ .. ( عن المثقف الحقيقى اتكلم وليس عن مدعى الثقافه )
سؤالى :
ياترى الاحساس ده هو اللى بيخلى المثقف مستخسر نفسه فى الناس أو مستكتر نفسه عليهم وبالتالى ماعندوش استعداد يدفع تمن مواقفه ويعمل اللى عملوه امثاله فى أوروبا العصور الوسطى .. وبالتالى يا اما يضطر لمداهنة السلطه لتفادى بطشها ..وتضليل الناس مستغلا أدواته ومكانته .. أو كأضعف الايمان ينكمش داخل ذاته ويتضاءل حتى يتلاشى ..؟؟"!!!
نظره سريعه لتاريخنا القريب ... نجد ان أكثر من خان هذا البلد .. هم مثقفوه ..
وباتمنى أكون غلطان !!

مسافة الطريق

مســـــافـة الطــريـق .. وفـرق الســاعـات
وهاخدك فى حضنى واضمك .. ســاعـات
ونحـكى بشـــفايف .. وجـعــهـا الســــكـات
وأحــوش لبـكره .. واعـوض مـافـــــــــات


وصلـت لـبـيـبـانك .. واغمض .. وافـَتــَـح
اصـبر فـى قـلـبـى : شـــويه وها تـفــَــرح
أنــــــــادى .. وأخـبـــط .. ولا حـد يـفـتــح
ســراب والا باب .. والا غافـل وباســـــرح

اوزن برااااا

لم يدهشنى كثيرا ॥ ان يكون من حيل الحكومه لاستعادة ما دفعته للناس فى العلاوه الجديده هو اقتطاع مبلغ مليار وتسعمائة مليون جنيه من ميزانية التعليم .. وكأن التعليم رفاهيه يمكن الاستغناء عنها فى ظل الأزمات .. رغم أنه - التعليم - ياعتراف الدنيا كلها وتجارب الدول التى اجتازت سباق التقدم .. هو المخرج الحقيقى من الأزمات .
وقد يبدو الأمر وكأنه مجرد قصر نظر ( ذلك المرض الوراثى القابع فى جينات حكامنا ) والحقيقه أنه توجه طبيعى يؤكد أن النظام هو الراعى الرسمى للظلم والظلام فى هذا البلد .
ويشير بلا مواربه الى فلسفة الحكم .. والى أى الطبقات ينتمى .. والمصالح التى يراعيها .. حيث انه فى نفس الوقت يهدر المليارات فى الزفت !!( تطوير طرق سريعه) .. وقطارات سريعه .. فى وقت يعز فيه رغيف الخبز على الناس ..
وليكون ختامها مسك نقرأ البشاره التى لايكتمل فهمنا للأمر الا بها ... وهى زيادة ميزانية وزارة الداخليه .
يعنى ميزانيه موزونه صح .. واللى مش عاجبه .. يوزن برا !!!!!

المقريزى .. طبعه جديده

المؤرخ المصرى المولود منذ سبعة قرون تقريبا ..
له كتاب عن المجاعات التى مرت بها مصر عبر تاريخها.. اسمه
( اغاثة الأمه فى كشف الغمه ).. وكان يرى فى أغلب الأحوال فى تفسيره للمجاعات ..
أنها كانت تحدث فى غفلة من الحكام ..
الذين فضل معظمهم الابتعاد عن الجماهير ، وجعلوا كل همهم في جني الأموال
وتحصيلها والإكثار منها، والاحتفاظ بالسلطة والحكم بمختلف
الوسائل الأخلاقية وغير الأخلاقية، ومهما حل بالشعب من آلام ومصائب ..
وحمّل مسؤولية هذه المجاعات للحكام الغافلين عن مصالح العباد، والغارقين
في ملذات الدنيا وعبثها (ذكر منها قرابة ستاً وعشرين مجاعة).
ياترى .. لو عاد المقريزى .. أو بعث فى أيامنا ..
هل كان سيصدر طبعة جديده من كتابه ( اغاثة الأمه ... )
تخيل نفسك مقريزى هذا العصر .. وحاول كتابة فصل جديد

مع ملاحظة أنه عاش منذ سبعة قرون ..
ولم يكن منضما لأى حزب فى أيامه ..
ولم يكن ناشطا سياسيا فى حركة كفايه

لوغاريتمات

فوق الجبين كان مكتوبنا
شاب الجنين واحنا ما تبنا
كداب ياحجاب كاسى دروبنا
بجهاله وغبا وخيوط دايبه
على نول مشتول ننسج توبنا

بنحلِى الذل بمر الصبر
ونحل العقده بحيله وهبر
ونعيش فى عذاب وعذاب فى القبر
الرزق اتقسم فى الاسواق
لوغاريتمات ومسائل جبر

آ يا ليل يا كسول ساكن بيتنا
مات المسئول جيت عزيتنا
والصبح خجول ولا بيغيتنا
وعليه اسياد ليهم طلبات :
نتعلم نوفى بكلمتنا

عشاق للشكل وللمظهر
خريج سوربون خريج أزهر
مين فيهم صوت أعلى وأشهر
لتنين فارغين لاعلوم ولا دين
طنطنه وبجاحه وديل أزعر

ورضعنا فنون الكدب رضاعه
كرامتنا تهون بالغصب وطاعه
باطن مكنون لو يظهر ساعه
من بز الخوف يتعبى الجوف
نكدب ونخون ونصلى جماعه

ساعات ..

ساعات ساعات باحس
جوايا حته غامضه
تكسر كل القواعد
وتفضل هى صامده
****
ساعات ساعات باحس
جوايا حته ضالمه
ماقدرش احكم عليها
مظلومه والا ظالمه
****
حاسس جوايا شيطان
كامن ورا سور وحيطان
يخرج لحظه الاقينى
عبد وهو السلطان

فى حضنك

فى حضنك
باحس بالحنان ..
واحس بالشبع
وانام كده ف امان ..
لا خوف .. ولا فزع
باحس إنى فارس ..
جبار .. لكن جدع
.......
.......
فى حضنك ..
باكون أغنى بنى آدم
وباستغنى عن العالم
واعيش الدنيا بمزاجى
ولما احتاج وتحتاجى
اريح راسى فى صدرك
على حسك اروح وآجى
فى ونسة سنك العاجى
يسيل دمعى على حجرك
.......
.......

حضنك تاريــــــخى وغزواتى
ويوم غضبان .. ويوم راضى
ولا خـــايــــف من الآتــــى ..
ولا خجــــلان .. من المــاضى

نقطه ..!!

كتير المدونات .. واللى بيكتبوا أكتر يمكن من اللى بيقروا ..!!
وده سبب أدعى للكسل والاحباط ..
لكن ..
وبعد تردد .. طال كثيرا .. ورغم انى من جيل ورقه وقلم ومرايه ..
فقد اقتنعت تماما انها متنفس حقيقى .. وقررت أدون ..
اللى عايز اقوله ..
لنفسى .. ولعدد - مهما قل - من الناس ..
شىء أقرب للمذكرات ..
أو ملاحظات عامه عن الحاصل .. لى .. ولنا ..يعنى ..
باختصار .. محاوله - قدر الاستطاعه - انى أكون نفسى ..
ولو كلامى مش شبهك ... المرايات كتير ... اخترلك واحده ..!!!!