ايه ؟ .. مالك ؟
ساكته ليه ؟ مش عوايدك
صعب حالك ؟؟
صعب أكتر ع اللى رايــدك
اللى شد رحاله جالك
واللى داب على باب وصالك
واللى يدفع عمره سهم ف رأسمالك
لجل ماتكتر عوايدك
....
ايه ؟ .. مالك ؟
ساكته ليه ؟ ماسكه راسك ؟
بتفكرى .. والا صداع
والا مهمومه بناسك ؟
اللى بايع .. واللى ضاع
واللى مايهموش خلاصك
الولاد كبروا يامّه ..
اللى - وهو طفل - باسك
لما شب .. جاتله طوفه
حب يخرج من لباسك
وببساطه شافله شوفه
قال مصالحى قام وداسك
....
ساكته ليه ؟
بلى ريقى بكلمتين
أو دمعتين
أو حتى شاورى ع الوجع
قولى فين
عندك أمل حد يرجع م الولاد
ويكون جدع
ويشيل مظالمك ؟!
قاعده لسه مقرفصه
وبتسمعى صوت الودع
على شط حلمك ؟!
خوووووف .. وهمس .. ووشوشات
ماعادش معنى للسكات
ولاعادش طعم لأى حاجه م الحاجات
غير المرار فى الحلق باقى
وجثة الأمل اللى مات
الولاد ؟؟!!
الولاد كبروا يامّه
بعتروا دقيقك وزيتك
باعوا صيغتك
رهنوا بيتك
ورثوكى من قبل الممات
....
عايز ارجّع !
عايز افضى جوفى من كل العفن
عايز أنااااام
خايف يا أمى
ليلاتى باحلم بالكفن
اصلى واحد من عيالك
اللى عشقوا ف يوم جمالك
واللى غضبوا
واللى هربوا
ولاشغلهم يوم سؤالك
ايه ؟ .. مالك ؟
ساكته ليه ؟؟
هناك 4 تعليقات:
تفتكر هترد تقول ايه بعد كل ده ):
مالي؟زي حالي مايل
وفوق حمولي زاد حمايل
زاد وغطى باللي رد
بالخيانه نور جميلي والجمايل؟!!
سويت فايوليت
هى أكيد مش هاترد ..
الا لو اتغير حالنا .. وحالها
شكرا لمرورك الكريم Sweet Violet
اهى د. الشيماء ردت بالنيابه!!
امتنانى يادوك للمتابعه
إرسال تعليق