ناس من بلدنا

الناس اللى بتمشى محاسبه
مغصوبه وغاصبه
محشوره فى كل حكايه
وكل مناسبه

أول من يقبض

آخر من يدفع
وكلامهم حلو ومترتب وبيقنع
الصبح تحرض عمال
والمغرب تتجوز عرفى صاحب المصنع

تلقاهم آخر صف فى اى مظاهره
ولاترتاح وتريح
ولا تسمح بمخاطره
فى الشده تجرى وتتدارى
تختفى فتره
ولاوقفت فى طابور العيش
ولاشربت كيلوباتره
مستقبلهم دايما وردى
وسيرتهم عاطره
نسوانهم حلوه وناعمه
وعيالهم شاطره