كله يقف فى الصف

كله يقف فى الصف
ولا حركه ولاكلمه زياده
تنطق .. تاخد كف
والصمت فضيله وعباده

*****

اللى نقـــوله تمـام ينعـــــــاد
م الجِـد لحـد الأحـفــــــــــــاد
والحاكم والشـيخ أسـيـــــــاد ... والباقى على الرف
كله يقف فى الصف

ناكر فضل وعدل المولــــى
وانت لاقوه ليك ولاحـــــولَ
حبل الصبر ف آخر الجوله ... فى رقبتــــك يتلف
كله يقف فى الصف

انت خروف من ضمن قطيع
بات معلوف والصبح مطيع
تعمل فيها أســـد وشجــــــيع ... بفضيحه هاتتزف
كله يقف فى الصف

تحـلـم بالعــدل ياغنــــــدور
وتعيش حريه بلاســـــــور
طاير وجناحك مكســـــور ... والأحلام ليها سقف
كله يقف فى الصف

خارج بره السرب ونافر
خاين لو فى سياسه تعافر
لو تعقلها فى دينك كافر ... والله وعقلك خف
كله يقف فى الصف