مش عارف ليه كل مااسمع كلمة ( مثقف ) .. أفتكر مطلع الأغنيه دى .. ياجريد النخل العالى .. ميل وارمى السلام !!
هل هى النظره الشايعه عن المثقفين .. صوره نمطيه عن حد شعره منكوش .. ومابيستحماش .. وتصرفاته توحى بأعراض الشيزوفرينيا
؟؟ ... هل لأن الناس دايما شايفينه غامض ودايما بينه وبينهم مسافه .. لا هو عايز ينزل .. ولا هم قادرين يطلعوا ..؟؟!!
ودايما بنقرا عن أزمة المثقف مع السلطه .. والقمع .. الخ الخ ..
والحقيقه ان أزمة المثقف - فى بلادنا - الحقيقيه مع الناس ..
المثقف فى مجتمع نصفه تقريبا أمى .. يكسوه احساس تلقائي - لاواعى - بالتميز .. وانه من طينه مختلفه .. وبالتالى يتعاظم احساسه بالغربه .. وان ماحدش فاهمه .. وأنه سابق عصره .. الخ الخ .. ( عن المثقف الحقيقى اتكلم وليس عن مدعى الثقافه )
سؤالى :
ياترى الاحساس ده هو اللى بيخلى المثقف مستخسر نفسه فى الناس أو مستكتر نفسه عليهم وبالتالى ماعندوش استعداد يدفع تمن مواقفه ويعمل اللى عملوه امثاله فى أوروبا العصور الوسطى .. وبالتالى يا اما يضطر لمداهنة السلطه لتفادى بطشها ..وتضليل الناس مستغلا أدواته ومكانته .. أو كأضعف الايمان ينكمش داخل ذاته ويتضاءل حتى يتلاشى ..؟؟"!!!
نظره سريعه لتاريخنا القريب ... نجد ان أكثر من خان هذا البلد .. هم مثقفوه ..
وباتمنى أكون غلطان !!
هناك 4 تعليقات:
هو مش نشر التدوينه دي هنا اكبر اثبات لتقوقع المثقف ياصديقي اللدود ؟
ماشي
قبل ما اقولك هو مين المثقف في رأيك؟
انا هقولك ان ازمة المثقف تقريبا مع ذاته قبل ماتكون مع الناس...
ازاي؟
فيه جيلين من المثقفين حاليا
جيل النت والكومبيوتر ودول فيهم امل لانهم لسه ما انفصلوش عن الواقع.حتى ثقافتهم تقدر تقول ملامحها لم تنضج بعد.
الجيل القديم صاحب الثقافة الموسوعيه واظن هذا من تعنيه دول يصح فيهم القول (سوق الثقافة جبر ...)ازمتهم تتلخص بغرورهم وقلة عطاءهم رغم ان الاجهزة عوضت عن حاجة الناس ليهم ..ماعادوا قادرين على العطاء
يستثنى من هؤلاء الفنانين طبعا والمبدعين شعرا وموسيقى وخلافه
ويبقى الحديث في هذا الامر ذو شجون بعيدا عن القوقعة
ينكمش داخل ذاته ويتضاءل حتى يتلاشى ..؟؟"!!!
خلينى اتفق مع راى اختى الشيماء و اختلف شويه فى ان البلوج نوع من انواع الانفراد بالذات بس ممكن منخليهوش اخد جنب من المجتمع
و نعتبرها نوته خاصه او ركن خاص .. جلسة فضفضه
نرجع باه للمثقف او خلينا نقول المفكر الذى لا يلقى مساحه مشتركه
يحاور فيها غيره فينغلق مخلفا وراءه مجتمعا غارق فى فكره او مجموعه من المنغلقين
او كما ظننت انت و تمنيت ان يكون ظنك خاطئا
د. الشيماء
هاتجاوز افتراضك انى مثقف .. وهاعترف ان المدونه دى كانت احتياج خاص فى ظرف خاص مش أكتر ..
أما تعريف المثقف خليها موضوع مستقل يمكن نتكلم فيه .. لكن الأكيد ان المثقف مش هو الموسوعه زى ماقلتى عن الجيل القديم .. يعنى مش منجرد حد حافظ معلومات وبيكرها .. والا كان مستر جوجل بقى أثقف حد فى الدنيا !!
خلينا نقول اختصارا انه ( بالاضافه للعلم والمعرفه ) هو صاحب رؤيه توصل المجتمع لبكره ..
عموما كانت فكرتى مش عن الأجيال وفرق التكنولوجيا .. كان قصدى ان تاريخنا القريب بيأكد ان المثقفين تخلوا عن مسؤلياتهم .. بعضهم استسلم وماقدرش يقاوح موجات الاحباط .. وبعضهم عن عمد وتواطؤ مع السلطه .. وسابوا الناس يواجهوا التخلف والقهر بلا سند .. واتفق معاكى بلاشك .. ان الأمل فى بكره .. لو اهل بكره استوعبوا درس البارح
أهلا سهر .. نورتى القوقعه !!
اتفقتى مع الشيماء ؟؟ .. أنا عايز راجل يطلعلى بره ..!!!
البلوج اطلاقا مش انعزال عن المجتمع .. بدليل ان شباب المدونات كان ليهم تأثير كبير الفتره اللى فاتت فى كشف جرائم التعذيب وغيرها ..
طبعا مش هدفى اناطح أو أنافس أو أقلد الشباب .. فرق السن مايسمحش !! .. لكن هى مدوحره فى استغلال وسيله فيها شىء من الخصوصيه أتاحتها التكنولوجيا لتسجيل ماتيسر من انفعالات وتفاعلات خاصه أو عامه ..
أما عن المثقف .. فاعتقادى ان المثقف اللى مايحاربش عشان يخلق مساحة الحريه يبقى مجرد ( فاترينة عرض ) للمعلومات مش أكتر .. وحتى طرحه الفكرى هايكون بلاشك مهزوز وخايف ..
إرسال تعليق